ahl-e-dil ahl-e-nazar sham-o-sahar roya kiye

ahl-e-dil ahl-e-nazar shām-o-sahar royā kiye

dard ke putle the āḳhir umr bhar royā kiye

hāl-e-ahl-e-dard ne un ko rulāyā umr bhar

jin ko hairat thī ye kyūñkar raat bhar royā kiye

dil kī majbūrī pe rone se jo maiñ rokā gayā

bebasī se dil ke chhāle phuuT kar royā kiye

pās-e-nāmūs-e-mohabbat ne kuchh aisā kah diyā

sar jhukā kar ham to vo muñh pher kar royā kiye

jin se halchal thī jahān-e-āshiqī meñ mere ba.ad

aise nāloñ ke liye dard-o-asar royā kiye

zauq-e-girya dil ko thā jaane vahī us kā sabab

kyā batā.eñ tujh ko ham kyoñ umr bhar royā kiye

ham na kahte the ki itnī saḳhtiyāñ achchhī nahīñ

tum na 'beḳhud' ko miTā kar umr bhar royā kiye

ahl-e-dil ahl-e-nazar sham-o-sahar roya kiye

dard ke putle the aaKHir umr bhar roya kiye

haal-e-ahl-e-dard ne un ko rulaya umr bhar

jin ko hairat thi ye kyunkar raat bhar roya kiye

dil ki majburi pe rone se jo main roka gaya

bebasi se dil ke chhaale phuT kar roya kiye

pas-e-namus-e-mohabbat ne kuchh aisa kah diya

sar jhuka kar hum to wo munh pher kar roya kiye

jin se halchal thi jahan-e-ashiqi mein mere baad

aise nalon ke liye dard-o-asar roya kiye

zauq-e-girya dil ko tha jaane wahi us ka sabab

kya bataen tujh ko hum kyon umr bhar roya kiye

hum na kahte the ki itni saKHtiyan achchhi nahin

tum na 'beKHud' ko miTa kar umr bhar roya kiye