ahl-e-dil bhi dekhiye ab kya se kya karne lage

ahl-e-dil bhī dekhiye ab kyā se kyā karne lage

shīshagar bhī pattharoñ se mashvara karne lage

de diyā hai tajrabāt-e-zindagī ko ruḳh nayā

aaj ham apne ta.iiñ har faisla karne lage

mas.aloñ kā hal nazar aa.egā kaise dosto

ham dar-e-aġhyār par jab iltijā karne lage

is liye vo jūjhte haiñ roz-o-shab hālāt se

jo zarā sī baat par jhagḌā khaḌā karne lage

ye siyāsī log banjāroñ key tarah dekhiye

bastiyoñ se duur jā kar ratjagā karne lage

hazrat-e-ayyūb ko kyā paḌh liyā tum ne 'bahār'

sābiroñ kī zindagī par tabsira karne lage

ahl-e-dil bhi dekhiye ab kya se kya karne lage

shishagar bhi pattharon se mashwara karne lage

de diya hai tajrabaat-e-zindagi ko ruKH naya

aaj hum apne tain har faisla karne lage

masalon ka hal nazar aaega kaise dosto

hum dar-e-aghyar par jab iltija karne lage

is liye wo jujhte hain roz-o-shab haalat se

jo zara si baat par jhagDa khaDa karne lage

ye siyasi log banjaron key tarah dekhiye

bastiyon se dur ja kar ratjaga karne lage

hazrat-e-ayyub ko kya paDh liya tum ne 'bahaar'

sabiron ki zindagi par tabsira karne lage