اہل دل کوچۂ اصنام تک آ پہنچے ہیں

اہل دل کوچۂ اصنام تک آ پہنچے ہیں

فاصلے عرصۂ دو گام تک آ پہنچے ہیں

جو تہ خم میں ہو باقی وہی دے دے ساقی

بادہ کش درد تہ جام تک آ پہنچے ہیں

ہو چکے اہل یقیں وادیٔ اوہام میں گم

اہل شک منزل الہام تک آ پہنچے ہیں

جب خودی کا ہے یہ عالم تو خدا دور نہیں

بت شکن محفل اصنام تک آ پہنچے ہیں

پھر گئی راہ سے امید کی چڑھتی ہوئی دھوپ

یاس کے سائے در و بام تک آ پہنچے ہیں

شوق گستاخ ہے اب پردہ کشائے اسرار

خاص جلوے نگہ عام تک آ پہنچے ہیں

میری قسمت کا ستارا تو نہ تھا اتنا بلند

کس کی خاطر وہ لب بام تک آ پہنچے ہیں

ہم نشینوں کو مبارک کرم خاص ترا

ہم بھی اب رسم و رہ عام تک آ پہنچے ہیں

دیکھیے کس کو یہ اعزاز خصوصی ہو نصیب

لب ترے منزل دشنام تک آ پہنچے ہیں

کبھی ایسا بھی ہوا ہے کہ ترے دیوانے

تیری دھن میں ترے ہم نام تک آ پہنچے ہیں

راہ پر ان کو لگا لایا دعاؤں کا خلوص

صبح بھٹکے تھے مگر شام تک آ پہنچے ہیں

ہائے وہ لوگ جو ہوں لذت آغاز میں گم

وائے وہ لوگ جو انجام تک آ پہنچے ہیں

میری نظریں گل و گلزار سے آگے نہ بڑھیں

تیرے جلوے سحر و شام تک آ پہنچے ہیں