ahl-e-dil kucha-e-asnam tak aa pahunche hain

ahl-e-dil kūcha-e-asnām tak aa pahuñche haiñ

fāsle arsa-e-do-gām tak aa pahuñche haiñ

jo tah-e-ḳhum meñ ho baaqī vahī de de saaqī

bāda-kash durd-e-tah-e-jām tak aa pahuñche haiñ

ho chuke ahl-e-yaqīñ vādī-e-auhām meñ gum

ahl-e-shak manzil-e-ilhām tak aa pahuñche haiñ

jab ḳhudī kā hai ye 'ālam to ḳhudā duur nahīñ

but-shikan mahfil-e-asnām tak aa pahuñche haiñ

phir ga.ī raah se ummīd kī chaḌhtī huī dhuup

yaas ke saa.e dar-o-bām tak aa pahuñche haiñ

shauq gustāḳh hai ab parda-kushā-e-asrār

ḳhaas jalve nigah-e-ām tak aa pahuñche haiñ

merī qismat kā sitārā to na thā itnā buland

kis kī ḳhātir vo lab-e-bām tak aa pahuñche haiñ

ham-nashīnoñ ko mubārak karam-e-ḳhās tirā

ham bhī ab rasm-o-rah-e-'ām tak aa pahuñche haiñ

dekhiye kis ko ye e.azāz-e-ḳhusūsī ho nasīb

lab tire manzil-e-dushnām tak aa pahuñche haiñ

kabhī aisā bhī huā hai ki tire dīvāne

terī dhun meñ tire hamnām tak aa pahuñche haiñ

raah par un ko lagā laayā du'āoñ kā ḳhulūs

sub.h bhaTke the magar shaam tak aa pahuñche haiñ

haa.e vo log jo hoñ lazzat-e-āġhāz meñ gum

vaa.e vo log jo anjām tak aa pahuñche haiñ

merī nazreñ gul-o-gulzār se aage na baḌhīñ

tere jalve sahar-o-shām tak aa pahuñche haiñ

ahl-e-dil kucha-e-asnam tak aa pahunche hain

fasle arsa-e-do-gam tak aa pahunche hain

jo tah-e-KHum mein ho baqi wahi de de saqi

baada-kash durd-e-tah-e-jam tak aa pahunche hain

ho chuke ahl-e-yaqin wadi-e-auham mein gum

ahl-e-shak manzil-e-ilham tak aa pahunche hain

jab KHudi ka hai ye 'alam to KHuda dur nahin

but-shikan mahfil-e-asnam tak aa pahunche hain

phir gai rah se ummid ki chaDhti hui dhup

yas ke sae dar-o-baam tak aa pahunche hain

shauq gustaKH hai ab parda-kusha-e-asrar

KHas jalwe nigah-e-am tak aa pahunche hain

meri qismat ka sitara to na tha itna buland

kis ki KHatir wo lab-e-baam tak aa pahunche hain

ham-nashinon ko mubarak karam-e-KHas tera

hum bhi ab rasm-o-rah-e-'am tak aa pahunche hain

dekhiye kis ko ye eazaz-e-KHususi ho nasib

lab tere manzil-e-dushnam tak aa pahunche hain

kabhi aisa bhi hua hai ki tere diwane

teri dhun mein tere hamnam tak aa pahunche hain

rah par un ko laga laya du'aon ka KHulus

subh bhaTke the magar sham tak aa pahunche hain

hae wo log jo hon lazzat-e-aghaz mein gum

wae wo log jo anjam tak aa pahunche hain

meri nazren gul-o-gulzar se aage na baDhin

tere jalwe sahar-o-sham tak aa pahunche hain