ahl-e-duniya ne sikhaya mujhe hairan hona

ahl-e-duniyā ne sikhāyā mujhe hairāñ honā

kaise insāñ haiñ ki aatā nahīñ insāñ honā

kyā tirī zulf-e-siyah-tāb ko ai māya-nāz

ġham-e-ulfat se bhī aatā hai pareshāñ honā

ġhairat-e-mehr kahā un ko to hañs kar bole

kaise manzūr ho ab sham-e-shabistāñ honā

aur husn-e-ġham-e-hastī ko baḌhā detā hai

shauq-e-gesū meñ tire dil kā pareshāñ honā

na bahāroñ se ġharaz hai na ḳhizāñ se matlab

siikh le mujh se koī ḳhār-badāmāñ honā

merī dānist meñ tauhīn-e-gunahgārī hai

ai gunahgār gunāhoñ pe pashemāñ honā

qa.ar-e-dariyā meñ bhī ik sāhil-e-rāhat hai nihāñ

bhuul hai mauja-e-tūfāñ se hirāsāñ honā

ahl-e-duniya ne sikhaya mujhe hairan hona

kaise insan hain ki aata nahin insan hona

kya teri zulf-e-siyah-tab ko ai maya-naz

gham-e-ulfat se bhi aata hai pareshan hona

ghairat-e-mehr kaha un ko to hans kar bole

kaise manzur ho ab sham-e-shabistan hona

aur husn-e-gham-e-hasti ko baDha deta hai

shauq-e-gesu mein tere dil ka pareshan hona

na bahaaron se gharaz hai na KHizan se matlab

sikh le mujh se koi KHar-badaman hona

meri danist mein tauhin-e-gunahgari hai

ai gunahgar gunahon pe pasheman hona

qar-e-dariya mein bhi ek sahil-e-rahat hai nihan

bhul hai mauja-e-tufan se hirasan hona