ahl-e-duniya waqif-e-asrar-e-pinhan ho gae

ahl-e-duniyā vāqif-e-asrār-e-pinhāñ ho ga.e

dāstān-e-ġham sunā kar ham pashemāñ ho ga.e

mere aañsū un kī āñkhoñ meñ numāyāñ ho ga.e

ab pareshāñ karne vaale ḳhud pareshāñ ho ga.e

pursish-e-ġham karne vaale baḌh gayā kuchh aur ġham

chand qatre āñsuoñ ke baḌh ke tūfāñ ho ga.e

jo ḳhulūs-e-bandagī ke muntazir the aaj tak

mere sajdoñ se vo naqsh-e-pā numāyāñ ho ga.e

bāġhbāñ se kyā shikāyat us kā dāman paak hai

ab to ḳhud gulchīñ bhī gulshan ke nigahbāñ ho ga.e

ik hamārī hī nazar nākām-e-sāhil kyā rahī

jaane kitne hī safīne nazr-e-tūfān ho ga.e

'ishq kā anjām ai dil kitnā ibrat-nāk hai

merī hālat dekhne vaale pareshāñ ho ga.e

juzv-e-fitrat kab banā dard-e-mohabbat kyā ḳhabar

is qadar ham 'shauq' mahv-e-husn-e-jānāñ ho ga.e

ahl-e-duniya waqif-e-asrar-e-pinhan ho gae

dastan-e-gham suna kar hum pasheman ho gae

mere aansu un ki aankhon mein numayan ho gae

ab pareshan karne wale KHud pareshan ho gae

pursish-e-gham karne wale baDh gaya kuchh aur gham

chand qatre aansuon ke baDh ke tufan ho gae

jo KHulus-e-bandagi ke muntazir the aaj tak

mere sajdon se wo naqsh-e-pa numayan ho gae

baghban se kya shikayat us ka daman pak hai

ab to KHud gulchin bhi gulshan ke nigahban ho gae

ek hamari hi nazar nakaam-e-sahil kya rahi

jaane kitne hi safine nazr-e-tufan ho gae

'ishq ka anjam ai dil kitna ibrat-nak hai

meri haalat dekhne wale pareshan ho gae

juzw-e-fitrat kab bana dard-e-mohabbat kya KHabar

is qadar hum 'shauq' mahw-e-husn-e-jaanan ho gae