ahl-e-gham se ishrat-e-alam ka saman ho gaya

ahl-e-ġham se ishrat-e-ālam kā sāmāñ ho gayā

jab zamīñ kī daaġh ubhar aa.e gulistāñ ho gayā

apnī had se baḌh ke jaatā kis taraf ko dil mirā

jaan paḌte hī ye musht-e-ḳhāk be-jāñ ho gayā

ishq ke ba.ad ab havādis kī zarūrat kyā rahī

āsmāñ dam le mire marne kā sāmāñ ho gayā

hashr meñ pahchān kar qātil kā muñh takne lagā

jab zarūrat hosh kī dekhī to hairāñ ho gayā

ḳhuftagān-e-ḳhāk kitnā be-mahal so.e ki ab

majma-e-ahbāb ik ḳhvāb-e-pareshāñ ho gayā

inqalāb aa kar madad dete haiñ istedād ko

karvaTeñ badleñ lahū ne aur insāñ ho gayā

rāsta vahshat ko āḳhir mil gayā tañgī meñ bhī

ye garebāñ thā jo do hāthoñ meñ dāmāñ ho gayā

vus.at-e-sahn-e-jahāñ kuchh kam na thī ai ishq dost

kyuuñ ghaTā itnā ki dil vāloñ ko zindāñ ho gayā

bāġhbāñ kī raa.e meñ maiñ be-haqīqat thā magar

ba.ad mere āshiyāñ dāġh-e-gulistāñ ho gayā

ruk chalā hai beach meñ ḳhanjar ilāhī ḳhair ho

dam na niklegā agar qātil pashemāñ ho gayā

ek qatra bahr-e-isyāñ kā thā jo yuuñ sar chaḌhā

palte palte dāman-e-ālam meñ tūfāñ ho gayā

jab koī aañsū mizha par aa ke chamkā shām-e-ġham

maiñ ye samjhā sub.h kā taarā numāyāñ ho gayā

shukr shāne kā karūñ yā sabr ko DhūñDūñ kahīñ

zulf to simTī magar haañ dil pareshāñ ho gayā

kam se kam par aaj raazī haiñ shahīdoñ ke mazār

aap hañs deñge to samjheñge charāġhāñ ho gayā

jis meñ lākhoñ phuul the 'sāqib' vo bāġh-e-dil-kushā

ek hī gardish meñ gardūñ kī bayābāñ ho gayā

ahl-e-gham se ishrat-e-alam ka saman ho gaya

jab zamin ki dagh ubhar aae gulistan ho gaya

apni had se baDh ke jata kis taraf ko dil mera

jaan paDte hi ye musht-e-KHak be-jaan ho gaya

ishq ke baad ab hawadis ki zarurat kya rahi

aasman dam le mere marne ka saman ho gaya

hashr mein pahchan kar qatil ka munh takne laga

jab zarurat hosh ki dekhi to hairan ho gaya

KHuftagan-e-KHak kitna be-mahal soe ki ab

majma-e-ahbab ek KHwab-e-pareshan ho gaya

inqalab aa kar madad dete hain istedad ko

karwaTen badlen lahu ne aur insan ho gaya

rasta wahshat ko aaKHir mil gaya tangi mein bhi

ye gareban tha jo do hathon mein daman ho gaya

wusat-e-sahn-e-jahan kuchh kam na thi ai ishq dost

kyun ghaTa itna ki dil walon ko zindan ho gaya

baghban ki rae mein main be-haqiqat tha magar

baad mere aashiyan dagh-e-gulistan ho gaya

ruk chala hai beach mein KHanjar ilahi KHair ho

dam na niklega agar qatil pasheman ho gaya

ek qatra bahr-e-isyan ka tha jo yun sar chaDha

palte palte daman-e-alam mein tufan ho gaya

jab koi aansu mizha par aa ke chamka sham-e-gham

main ye samjha subh ka tara numayan ho gaya

shukr shane ka karun ya sabr ko DhunDun kahin

zulf to simTi magar han dil pareshan ho gaya

kam se kam par aaj raazi hain shahidon ke mazar

aap hans denge to samjhenge charaghan ho gaya

jis mein lakhon phul the 'saqib' wo bagh-e-dil-kusha

ek hi gardish mein gardun ki bayaban ho gaya