ahl-e-hawas ke hathon na ye karobar ho

ahl-e-havas ke hāthoñ na ye kārobār ho

ābād hoñ sitāre zamīñ regzār ho

ik shaan ye bhī jiine kī hai jī rahe haiñ log

tūfān se lagāo samundar se pyaar ho

hālāt meñ kabhī ye tavāzun dikhā.ī de

ġham mustaqil rahe na ḳhushī musta.ār ho

nafrat ke sañg-rezoñ kī bārish thame kabhī

dair-o-haram ke beach safar ḳhush-gavār ho

sadiyoñ se ghul rahī hai isī fikr meñ hayāt

rahzan se paak ziist kī har rahguzār ho

bād-e-sumūm luuT le chehroñ kī tāzgī

aglī sadī kī aisī na fasl-e-bahār ho

'najmī' jo apne ahd kī tārīḳh ban ga.e

un shā.iroñ meñ kaash mirā bhī shumār ho

ahl-e-hawas ke hathon na ye karobar ho

aabaad hon sitare zamin regzar ho

ek shan ye bhi jine ki hai ji rahe hain log

tufan se lagao samundar se pyar ho

haalat mein kabhi ye tawazun dikhai de

gham mustaqil rahe na KHushi mustaar ho

nafrat ke sang-rezon ki barish thame kabhi

dair-o-haram ke beach safar KHush-gawar ho

sadiyon se ghul rahi hai isi fikr mein hayat

rahzan se pak zist ki har rahguzar ho

baad-e-sumum luT le chehron ki tazgi

agli sadi ki aisi na fasl-e-bahaar ho

'najmi' jo apne ahd ki tariKH ban gae

un shairon mein kash mera bhi shumar ho