ahl-e-hunar se nata-e-iKHlas joD ke

ahl-e-hunar se nāta-e-iḳhlās joḌ ke

dekhe haiñ khel maiñ ne bahut toḌ-phoḌ ke

sābit qadam agarche har ik imtihāñ meñ thā

ġham ne mire vajūd ko rakkhā jhiñjhoḌ ke

shāyad ki mil hī jaa.e tumheñ amn kā surāġh

jaatā huuñ apnī fikr kī parchhā.īñ chhoḌ ke

nikle the chand buuñd lahū aur kuchh nahīñ

dekhā thā maiñ ne vaqt kā dāman nichoḌ ke

azm-o-amal kī raah pe niklā nahīñ koī

rasm-e-kuhan kī āhanī dīvār toḌ ke

dekhā thā 'jāmī' sab ke saroñ par jafā kā taaj

rishtoñ kī Dor yāroñ kī bastī se joḌ ke

ahl-e-hunar se nata-e-iKHlas joD ke

dekhe hain khel main ne bahut toD-phoD ke

sabit qadam agarche har ek imtihan mein tha

gham ne mere wajud ko rakkha jhinjhoD ke

shayad ki mil hi jae tumhein amn ka suragh

jata hun apni fikr ki parchhain chhoD ke

nikle the chand bund lahu aur kuchh nahin

dekha tha main ne waqt ka daman nichoD ke

azm-o-amal ki rah pe nikla nahin koi

rasm-e-kuhan ki aahani diwar toD ke

dekha tha 'jami' sab ke saron par jafa ka taj

rishton ki Dor yaron ki basti se joD ke