ahl-e-ishq ki hasti kya ajib hasti hai

ahl-e-ishq kī hastī kyā ajiib hastī hai

marg-e-nā-gahānī ko zindagī tarastī hai

naam hai sukūñ jis kā jins vo nahīñ miltī

ashk jis kā hāsil haiñ vo ḳhushī to sastī hai

jis jagah mohabbat se husn-o-ishq milte haiñ

kaun sī vo duniyā hai kaun sī vo bastī hai

sau tarah rulātī hai bhuul kar agar hañsiye

roiye to ye duniyā khilkhilā ke hañstī hai

kyā zarūr pī kar hī ham surūr meñ aa.eñ

vo nazar salāmat hai be-piye hī mastī hai

jalva-hā-e-rañg-o-bū dil meñ kyā jagah paa.eñ

aañkh meñ jo bastā hai dil to us kī bastī hai

dūsre ke sāġhar par jo nazar nahīñ rakhte

un kī mai-parastī meñ shān-e-haq-parastī hai

kis kī mai-farosh āñkheñ bas ga.iiñ tasavvur meñ

be-niyāz jām-o-mai apnī mai-parastī hai

dil unheñ tarastā hai jab vo duur hote haiñ

jab qarīb aate haiñ aañkh unheñ tarastī hai

ham ne ishq-o-ulfat meñ vo fareb khaa.e haiñ

jin kī dil-farebī ko zindagī tarastī hai

sadqe āsmāñ-jāhī tere ḳhāksāroñ par

rashk-e-sad-bulandī hai ishq meñ jo pastī hai

be-sabāt paatā huuñ aksar un umīdoñ ko

haa.e jin umīdoñ par inhisār-e-hastī hai

jab zarā ḳhayāl aayā hosh ho ga.e ruḳhsat

ai 'rishī' un āñkhoñ meñ kis balā kī mastī hai

ahl-e-ishq ki hasti kya ajib hasti hai

marg-e-na-gahani ko zindagi tarasti hai

nam hai sukun jis ka jins wo nahin milti

ashk jis ka hasil hain wo KHushi to sasti hai

jis jagah mohabbat se husn-o-ishq milte hain

kaun si wo duniya hai kaun si wo basti hai

sau tarah rulati hai bhul kar agar hansiye

roiye to ye duniya khilkhila ke hansti hai

kya zarur pi kar hi hum surur mein aaen

wo nazar salamat hai be-piye hi masti hai

jalwa-ha-e-rang-o-bu dil mein kya jagah paen

aankh mein jo basta hai dil to us ki basti hai

dusre ke saghar par jo nazar nahin rakhte

un ki mai-parasti mein shan-e-haq-parasti hai

kis ki mai-farosh aankhen bas gain tasawwur mein

be-niyaz jam-o-mai apni mai-parasti hai

dil unhen tarasta hai jab wo dur hote hain

jab qarib aate hain aankh unhen tarasti hai

hum ne ishq-o-ulfat mein wo fareb khae hain

jin ki dil-farebi ko zindagi tarasti hai

sadqe aasman-jahi tere KHaksaron par

rashk-e-sad-bulandi hai ishq mein jo pasti hai

be-sabaat pata hun aksar un umidon ko

hae jin umidon par inhisar-e-hasti hai

jab zara KHayal aaya hosh ho gae ruKHsat

ai 'rishi' un aankhon mein kis bala ki masti hai