اہل خرد کو اہل نظر کا پتہ چلا

اہل خرد کو اہل نظر کا پتہ چلا

نکلے تو کتنے شمس و قمر کا پتہ چلا

سمجھے تھے ہم کہ سہل ہے یہ جادۂ حیات

آگے بڑھے تو سخت ڈگر کا پتہ چلا

اب تک مری نگاہ میں پایاب تھی ندی

جب ڈوبنے لگے تو بھنور کا پتہ چلا

نکلے تھے ہم تو شہر تھا گنجان دور تک

لوٹے تو پھر کسی کے نہ گھر کا پتہ چلا

شہرت ہماری پھیل گئی ہے جہان میں

مدت کے بعد اپنے ہنر کا پتہ چلا

فردوسؔ دھوپ دھوپ چلا زندگی کی راہ

اس کو نہ سایہ دار شجر کا پتہ چلا