ahl-e-zahir ko fann-e-jalwa-gari ne mara

ahl-e-zāhir ko fann-e-jalva-garī ne maarā

ahl-e-bātin ko tavānā-nazarī ne maarā

talḳh thī maut magar ziist se shīrīñ-tar thī

us se pūchho jise be-bāl-o-parī ne maarā

mundamil hote hue zaḳhm hare hone lage

saa.e saa.e meñ tirī ham-safarī ne maarā

dasht-e-ġhurbat ke shab-o-roz kī lazzat na milī

sar vatan meñ bhī bahut dar-ba-darī ne maarā

ishq aur dast-e-talab aisī bhī kyā majbūrī

shauq ko kāvish-e-daryūza-garī ne maarā

zaḳhm-e-pārīna bharā hī thā ki ai sozan-e-hāl

aur ik tiir tirī baḳhiya-garī ne maarā

dād-o-shamshīr ne jab jab bhī Darānā chāhā

qahqaha shauq kī shorīda-sarī ne maarā

sulh karnā to zamāne se hai āsāñ lekin

mujh ko 'zaidī' mirī bāliġh-nazarī ne maarā

ahl-e-zahir ko fann-e-jalwa-gari ne mara

ahl-e-baatin ko tawana-nazari ne mara

talKH thi maut magar zist se shirin-tar thi

us se puchho jise be-baal-o-pari ne mara

mundamil hote hue zaKHm hare hone lage

sae sae mein teri ham-safari ne mara

dasht-e-ghurbat ke shab-o-roz ki lazzat na mili

sar watan mein bhi bahut dar-ba-dari ne mara

ishq aur dast-e-talab aisi bhi kya majburi

shauq ko kawish-e-daryuza-gari ne mara

zaKHm-e-parina bhara hi tha ki ai sozan-e-haal

aur ek tir teri baKHiya-gari ne mara

dad-o-shamshir ne jab jab bhi Darana chaha

qahqaha shauq ki shorida-sari ne mara

sulh karna to zamane se hai aasan lekin

mujh ko 'zaidi' meri baaligh-nazari ne mara