ahwal-e-pareshan par kuchh tabsira us ka bhi

ahvāl-e-pareshāñ par kuchh tabsira us kā bhī

hālāt ke sirhāne kuchh der vo royā bhī

tajdīd-e-ta.alluq par kyā harf ki jab us ne

rishtoñ kī ibārat ko likh likh ke miTāyā bhī

sadiyoñ kī masāfat thī ab qissa-e-māzī hai

ummīd ke dariyā bhī ehsās ke sahrā bhī

kuchh der ko dam lene Thahre the yahāñ sāthī

pairoñ se lipaTne ko tayyār hai rasta bhī

likkhā thā jo afsāna vo ret pe likkhā thā

paanī pe banāyā thā jo naqsh banāyā bhī

kāġhaz ye samajhtā hai baar us pe ḳharāsheñ meñ

yaañ ḳhūn-e-jigar Tapkā jo lafz ki likkhā bhī

'āzād' tujhe us ne apnā nahīñ samjhā bas

go haal bhī pūchhā thā aur haath milāyā bhī

ahwal-e-pareshan par kuchh tabsira us ka bhi

haalat ke sirhane kuchh der wo roya bhi

tajdid-e-talluq par kya harf ki jab us ne

rishton ki ibarat ko likh likh ke miTaya bhi

sadiyon ki masafat thi ab qissa-e-mazi hai

ummid ke dariya bhi ehsas ke sahra bhi

kuchh der ko dam lene Thahre the yahan sathi

pairon se lipaTne ko tayyar hai rasta bhi

likkha tha jo afsana wo ret pe likkha tha

pani pe banaya tha jo naqsh banaya bhi

kaghaz ye samajhta hai bar us pe KHarashen mein

yan KHun-e-jigar Tapka jo lafz ki likkha bhi

'azad' tujhe us ne apna nahin samjha bas

go haal bhi puchha tha aur hath milaya bhi