ai azm-e-mukammal jo sahaara tera paun

ai azm-e-mukammal jo sahārā tirā pā.ūñ

duniyā ke añdhere meñ na.ī sham.a jalā.ūñ

har chiiz chamaktī huī sonā nahīñ hotī

har gaam pe kaise sar-e-taslīm jhukā.ūñ

iz.hār-e-mohabbat kā junūñ naam nahīñ hai

kis tarah se ye raaz zamāne ko batā.ūñ

mallāh bhī sāhil kā pata bhuul ga.e haiñ

Dartā huuñ kināre pe kahīñ Duub na jā.ūñ

huuñ sust magar paañv meñ laġhzish to nahīñ hai

āhista-ḳhirāmī kā maza kyoñ na uThā.ūñ

tauhīn mohabbat kī gavārā nahīñ varna

chāhūñ to har ik ashk se tūfān uThā.ūñ

shā.ir huuñ magar ye to zarūrī nahīñ 'maz.har'

har silsila-e-zulf ko zanjīr banā.ūñ

ai azm-e-mukammal jo sahaara tera paun

duniya ke andhere mein nai shama jalaun

har chiz chamakti hui sona nahin hoti

har gam pe kaise sar-e-taslim jhukaun

izhaar-e-mohabbat ka junun nam nahin hai

kis tarah se ye raaz zamane ko bataun

mallah bhi sahil ka pata bhul gae hain

Darta hun kinare pe kahin Dub na jaun

hun sust magar panw mein laghzish to nahin hai

aahista-KHirami ka maza kyon na uThaun

tauhin mohabbat ki gawara nahin warna

chahun to har ek ashk se tufan uThaun

shair hun magar ye to zaruri nahin 'mazhar'

har silsila-e-zulf ko zanjir banaun