اے عزم مکمل جو سہارا ترا پاؤں

اے عزم مکمل جو سہارا ترا پاؤں

دنیا کے اندھیرے میں نئی شمع جلاؤں

ہر چیز چمکتی ہوئی سونا نہیں ہوتی

ہر گام پہ کیسے سر تسلیم جھکاؤں

اظہار محبت کا جنوں نام نہیں ہے

کس طرح سے یہ راز زمانے کو بتاؤں

ملاح بھی ساحل کا پتہ بھول گئے ہیں

ڈرتا ہوں کنارے پہ کہیں ڈوب نہ جاؤں

ہوں سست مگر پاؤں میں لغزش تو نہیں ہے

آہستہ خرامی کا مزہ کیوں نہ اٹھاؤں

توہین محبت کی گوارا نہیں ورنہ

چاہوں تو ہر اک اشک سے طوفان اٹھاؤں

شاعر ہوں مگر یہ تو ضروری نہیں مظہرؔ

ہر سلسلۂ زلف کو زنجیر بناؤں