ai bagule ke libaade mein samai hui ret

ai bagūle ke libāde meñ samā.ī huī ret

saath rakh le mujhe ai vajd meñ aa.ī huī ret

taaki sūraj qarīñ aa.e to ye sahrā ho jaa.e

sau samundar tale us ne hai bichā.ī huī ret

baiThe baiThe mujhe chaurāhā banā detī hai

chaar samtoñ se mirī samt uḌaa.ī huī ret

sham-e-bīnā.ī muñDeroñ kā safar kartī rahī

dil uḌātā rahā āñkhoñ meñ basā.ī huī ret

ghar kī buniyād meñ ārām nahīñ kartī hai

ai mire dost ye Tīloñ se uThā.ī huī ret

har chamaktā huā zarra hai sitāra 'hāris'

āsmāñ hai mire qadmoñ meñ bichā.ī huī ret

ai bagule ke libaade mein samai hui ret

sath rakh le mujhe ai wajd mein aai hui ret

taki suraj qarin aae to ye sahra ho jae

sau samundar tale us ne hai bichai hui ret

baiThe baiThe mujhe chauraha bana deti hai

chaar samton se meri samt uDai hui ret

sham-e-binai munDeron ka safar karti rahi

dil uData raha aankhon mein basai hui ret

ghar ki buniyaad mein aaram nahin karti hai

ai mere dost ye Tilon se uThai hui ret

har chamakta hua zarra hai sitara 'haaris'

aasman hai mere qadmon mein bichai hui ret