اے چاند مرے بام پہ آ کر نہ رکا کر

اے چاند مرے بام پہ آ کر نہ رکا کر

محروم تمنا ہوں مجھے یوں نہ تکا کر

میں کہتی رہی اس سے مرا دل نہ دکھانا

کیا مل گیا جانے اسے اس دل کو دکھا کر

دیکھوں کہ مرا عکس ہے اس دل میں کہاں تک

کاجل بھری آنکھوں کو ان آنکھوں سے ملا کر

کہتا ہے تمہی سب ہو مری اور یہ سچ ہے

کہتا ہے مگر جھوٹ بھی پھر آنکھ ملا کر

میں چاہتی ہوں اب وہ مجھے دور سے دیکھے

آنکھوں سے یہ نزدیک کی عینک کو ہٹا کر

وہ روح مقدس جو ملی خواب میں مجھ سے

یہ مشورہ ہے اس کا کہ اتنا نہ ہنسا کر

ہر سمت سے میری ہی صدا پلٹے گی آخر

تو دیکھ لے آواز سے آواز ملا کر

وہ روح سے لپٹا ہوا اک فرضی پرندہ

دل نے یہ کہا چل کے اب اس کو بھی رہا کر