ai dast-e-iKHtiyar dar-e-inkishaf khol

ai dast-e-iḳhtiyār dar-e-inkishāf khol

dekheñ to kyā chhupā hai badan kā ġhilāf khol

vo chhed jis ko bharte hue dasht lag ga.e

dariyā se kah rahā huuñ vahī phir shigāf khol

tujh ko ḳhabar nahīñ hai baġhāvat ke zahr kī

ik baar ye mahāz to apne ḳhilāf khol

shāhā zabān-e-ḳhalq hai naqqāra-e-ḳhudā

tujh ko kabhī karegī nahīñ ye muaaf khol

mujh ko na bāñdh vaqt kī mamnuā shāḳh se

maiñ hī tire vajūd kā huuñ e'tirāf khol

vo raaz jis binā pe banī hai ye kā.enāt

duniyā se kar na jaa.eñ sabhī inhirāf khol

lahjoñ meñ gāñTh paḌne se pahle mire ġhanīm

ham jis pe laḌ rahe the vahī iḳhtilāf khol

nairangī-e-badan se bañdhī hai nazārgī

mujh kor-chashm par bhī koī koh-e-qāf khol

taḳhrīb kah rahī hai saqāfat kī dāstān

tafsīl chāhiye to chaman kā lihāf khol

phūloñ pe band haiñ tirī aamad ke dar 'munīr'

ḳhushbū ke iltimās pe apnā tavāf khol

ai dast-e-iKHtiyar dar-e-inkishaf khol

dekhen to kya chhupa hai badan ka ghilaf khol

wo chhed jis ko bharte hue dasht lag gae

dariya se kah raha hun wahi phir shigaf khol

tujh ko KHabar nahin hai baghawat ke zahr ki

ek bar ye mahaz to apne KHilaf khol

shaha zaban-e-KHalq hai naqqara-e-KHuda

tujh ko kabhi karegi nahin ye muaf khol

mujh ko na bandh waqt ki mamnua shaKH se

main hi tere wajud ka hun e'tiraf khol

wo raaz jis bina pe bani hai ye kaenat

duniya se kar na jaen sabhi inhiraf khol

lahjon mein ganTh paDne se pahle mere ghanim

hum jis pe laD rahe the wahi iKHtilaf khol

nairangi-e-badan se bandhi hai nazargi

mujh kor-chashm par bhi koi koh-e-qaf khol

taKHrib kah rahi hai saqafat ki dastan

tafsil chahiye to chaman ka lihaf khol

phulon pe band hain teri aamad ke dar 'munir'

KHushbu ke iltimas pe apna tawaf khol