ai dil-e-be-adab us yar ki saugand na kha

ai dil-e-be-adab us yaar kī saugand na khā

tuuñ har ik baat meñ dildār kī saugand na khā

rūh-e-chandr-badan ai bul-havas āzurda na kar

ḳhuub nahīñ turbat-e-mahyār kī saugand na khā

ye adā sarv meñ zinhār nahīñ ai qumrī

yaar ke qāmat o raftār kī saugand na khā

ḳhauf kar ḳhat kī siyāhī satī ai va.ada-ḳhilāf

har ghaḌī mus.haf-e-ruḳhsār kī saugand na khā

apnī āñkhoñ kī qasam khā ki liyā nahīñ maiñ ne

jaan le kar dil-e-bīmār kī saugand na khā

pech de de ke mire dil kuuñ pareshāñ to kyā

nāhaq us zulf-e-girah-dār kī saugand na khā

taab us ruḳh kī tajallī kī nahīñ tujh kuuñ 'sirāj'

tuuñ abas shola-e-dīdār kī saugand na khā

ai dil-e-be-adab us yar ki saugand na kha

tun har ek baat mein dildar ki saugand na kha

ruh-e-chandr-badan ai bul-hawas aazurda na kar

KHub nahin turbat-e-mahyar ki saugand na kha

ye ada sarw mein zinhaar nahin ai qumri

yar ke qamat o raftar ki saugand na kha

KHauf kar KHat ki siyahi sati ai wada-KHilaf

har ghaDi mushaf-e-ruKHsar ki saugand na kha

apni aankhon ki qasam kha ki liya nahin main ne

jaan le kar dil-e-bimar ki saugand na kha

pech de de ke mere dil kun pareshan to kya

nahaq us zulf-e-girah-dar ki saugand na kha

tab us ruKH ki tajalli ki nahin tujh kun 'siraj'

tun abas shola-e-didar ki saugand na kha