ai dil-e-nadan na koi tu sunahre KHwab dekh

ai dil-e-nādāñ na koī tū sunahre ḳhvāb dekh

band hotā jā rahā hai ab vafā kā baab dekh

un ke aane kī ḳhabar bād-e-sabā le aa.ī hai

ho rahā hai dil mirā betāb pe betāb dekh

chāñd ke jalve bhī tujh ko ā.eñge phīke nazar

ik nazar pahle tū us kā chehra-e-zartāb dekh

kyā zarā sā vaqt badlā sab ne āñkheñ pher liiñ

bebasī par muskurāte haiñ mire ahbāb dekh

bhuuk kahtī hai ki kar le aur thoḌī koshisheñ

aur thakan kahtī hai chal ab chal ke koī ḳhvāb dekh

kis qadar karne lage ahl-e-ḳhirad nādāniyāñ

vo badal baiThe haiñ apnā huliya-e-ādāb dekh

ab to sāhil bhī nazar aatā nahīñ hai duur tak

bach nikalne ke 'hirā' mañjhdār se asbāb dekh

ai dil-e-nadan na koi tu sunahre KHwab dekh

band hota ja raha hai ab wafa ka bab dekh

un ke aane ki KHabar baad-e-saba le aai hai

ho raha hai dil mera betab pe betab dekh

chand ke jalwe bhi tujh ko aaenge phike nazar

ek nazar pahle tu us ka chehra-e-zartab dekh

kya zara sa waqt badla sab ne aankhen pher lin

bebasi par muskuraate hain mere ahbab dekh

bhuk kahti hai ki kar le aur thoDi koshishen

aur thakan kahti hai chal ab chal ke koi KHwab dekh

kis qadar karne lage ahl-e-KHirad nadaniyan

wo badal baiThe hain apna huliya-e-adab dekh

ab to sahil bhi nazar aata nahin hai dur tak

bach nikalne ke 'hira' manjhdar se asbab dekh