اے دل ناداں نہ کوئی تو سنہرے خواب دیکھ

اے دل ناداں نہ کوئی تو سنہرے خواب دیکھ

بند ہوتا جا رہا ہے اب وفا کا باب دیکھ

ان کے آنے کی خبر باد صبا لے آئی ہے

ہو رہا ہے دل مرا بیتاب پہ بیتاب دیکھ

چاند کے جلوے بھی تجھ کو آئیں گے پھیکے نظر

اک نظر پہلے تو اس کا چہرۂ زرتاب دیکھ

کیا ذرا سا وقت بدلا سب نے آنکھیں پھیر لیں

بے بسی پر مسکراتے ہیں مرے احباب دیکھ

بھوک کہتی ہے کہ کر لے اور تھوڑی کوششیں

اور تھکن کہتی ہے چل اب چل کے کوئی خواب دیکھ

کس قدر کرنے لگے اہل خرد نادانیاں

وہ بدل بیٹھے ہیں اپنا حلیۂ آداب دیکھ

اب تو ساحل بھی نظر آتا نہیں ہے دور تک

بچ نکلنے کے حراؔ منجھدار سے اسباب دیکھ