ai dil-e-nadan tujhe samjhaen kya

ai dil-e-nādāñ tujhe samjhā.eñ kyā

ārzū-e-vasl meñ mar jaa.eñ kyā

ek raushan dil hamāre paas hai

ham añdheroñ se bhalā ghabrā.īñ kyā

jab safar kī koī bhī manzil nahīñ

ham bhī ḳhāk-e-rahguzar ban jaa.eñ kyā

kyā kareñ jab khet chiḌiyāñ chug ga.iiñ

ab agar pachhtā.eñ to pachhtā.eñ kyā

bevafā ko bā-vafā kahne lageñ

ishq kī rasm-e-kohan jhuTlā.eñ kyā

zindagī ḳhā.if hai ḳhud hī maut se

zindagī ke naam par itrā.eñ kyā

tabsire duniyā badal sakte nahīñ

tabsire hālāt par farmā.eñ kyā

ḳhāmushī jin kā muqaddar hai 'suhaib'

un zabānoñ kī sadā ban jaa.eñ kyā

ai dil-e-nadan tujhe samjhaen kya

aarzu-e-wasl mein mar jaen kya

ek raushan dil hamare pas hai

hum andheron se bhala ghabrain kya

jab safar ki koi bhi manzil nahin

hum bhi KHak-e-rahguzar ban jaen kya

kya karen jab khet chiDiyan chug gain

ab agar pachhtaen to pachhtaen kya

bewafa ko ba-wafa kahne lagen

ishq ki rasm-e-kohan jhuTlaen kya

zindagi KHaif hai KHud hi maut se

zindagi ke nam par itraen kya

tabsire duniya badal sakte nahin

tabsire haalat par farmaen kya

KHamushi jin ka muqaddar hai 'suhaib'

un zabanon ki sada ban jaen kya