ai dil-e-nadan ye jazb-e-ishq hai

ai dil-e-nādāñ ye jazb-e-ishq hai

dekh betābāna vo kaun aa gayā

lūTte ham kyā javānī kī bahār

ġhuncha-e-dil khilte hī murjhā gayā

aql-o-hosh-o-sabr-o-ārām-o-qarār

ek jaane se tire kyā kyā gayā

zindagī guzregī kis ummīd par

intizār-e-va.ada-e-fardā gayā

dil ko maiñ bahlā rahā huuñ is tarah

aa rahā hai aa.egā vo aa gayā

ishq meñ aayā hai ik aisā maqām

yaad jab maiñ ne kiyā vo aa gayā

haa.e vo un kī nigāh-e-sharm-sār

us nadāmat par maiñ ḳhud sharmā gayā

ik ajab shai hai sharāb-e-be-ḳhudī

kho gayā jab maiñ to sab kuchh pā gayā

tū ne 'sā.ib' ko gañvāyā be-sabab

ye ziyāñ terā hai us kā kyā gayā

ai dil-e-nadan ye jazb-e-ishq hai

dekh betabana wo kaun aa gaya

luTte hum kya jawani ki bahaar

ghuncha-e-dil khilte hi murjha gaya

aql-o-hosh-o-sabr-o-aram-o-qarar

ek jaane se tere kya kya gaya

zindagi guzregi kis ummid par

intizar-e-wada-e-farda gaya

dil ko main bahla raha hun is tarah

aa raha hai aaega wo aa gaya

ishq mein aaya hai ek aisa maqam

yaad jab main ne kiya wo aa gaya

hae wo un ki nigah-e-sharm-sar

us nadamat par main KHud sharma gaya

ek ajab shai hai sharab-e-be-KHudi

kho gaya jab main to sab kuchh pa gaya

tu ne 'saib' ko ganwaya be-sabab

ye ziyan tera hai us ka kya gaya