ai dil-e-zar likho jaanib-e-jaanan kaghaz

ai dil-e-zār likho jānib-e-jānāñ kāġhaz

haal kā likhte haiñ fuqarā sū-e-sultāñ kāġhaz

marja.a-e-gabr-o-musalmāñ hai vo but nām-e-ḳhudā

bhejte haiñ use hindū o musalmāñ kāġhaz

un kā mazmūn bhī albatta huvaidā hogā

ab jo aane lage us shoḳh ko pinhāñ kāġhaz

haif hai sub.h-e-vatan se na huā vārid-e-vaqt

hech gaahe ba-sar-e-shām-e-ġharībāñ kāġhaz

kisī kā bhī na javāb aayā hameñ ġhurbat meñ

laakh ham likhe vatan ko sū-e-yārāñ kāġhaz

vasf afshāñ kā hai kis sīm-badan ke likhnā

kāġhzī ham ko hai darkār zar-afshāñ kāġhaz

is qadar ham ne girāñ kar diye likh likh ke kise

varna kis martaba the shahr meñ arzāñ kāġhaz

likhte ham to ḳhat-e-mahbūb ko har dam nau-ḳhat

likhne dete jo hameñ dīda-e-giryāñ kāġhaz

mujh se dīvāne ko kyā ḳhat vo parī-zād likhe

likhte albatta haiñ insāñ sū-e-insāñ kāġhaz

bhejtā huuñ maiñ kisī rashk-e-gulistāñ kī taraf

merā pahuñchā.e magar murġh-e-gulistāñ kāġhaz

bhejtā huuñ maiñ kisī sānī-e-bilqīs ke saub

merā le jaa.e magar murġh-e-sulaimāñ kāġhaz

kyā magar bhuul ga.e bā.is-e-jam.iyyat-e-ḳhvesh

ham ko bheje na adam se jo azīzāñ kāġhaz

kahte haiñ nisf mulāqāt hai maktūb bhī yaar

kabhī likkho to sū-e-mātam-e-nālāñ kāġhaz

ai dil-e-zar likho jaanib-e-jaanan kaghaz

haal ka likhte hain fuqara su-e-sultan kaghaz

marja-e-gabr-o-musalman hai wo but nam-e-KHuda

bhejte hain use hindu o musalman kaghaz

un ka mazmun bhi albatta huwaida hoga

ab jo aane lage us shoKH ko pinhan kaghaz

haif hai subh-e-watan se na hua warid-e-waqt

hech gahe ba-sar-e-sham-e-ghariban kaghaz

kisi ka bhi na jawab aaya hamein ghurbat mein

lakh hum likhe watan ko su-e-yaran kaghaz

wasf afshan ka hai kis sim-badan ke likhna

kaghzi hum ko hai darkar zar-afshan kaghaz

is qadar hum ne giran kar diye likh likh ke kise

warna kis martaba the shahr mein arzan kaghaz

likhte hum to KHat-e-mahbub ko har dam nau-KHat

likhne dete jo hamein dida-e-giryan kaghaz

mujh se diwane ko kya KHat wo pari-zad likhe

likhte albatta hain insan su-e-insan kaghaz

bhejta hun main kisi rashk-e-gulistan ki taraf

mera pahunchae magar murgh-e-gulistan kaghaz

bhejta hun main kisi sani-e-bilqis ke saub

mera le jae magar murgh-e-sulaiman kaghaz

kya magar bhul gae bais-e-jamiyyat-e-KHwesh

hum ko bheje na adam se jo azizan kaghaz

kahte hain nisf mulaqat hai maktub bhi yar

kabhi likkho to su-e-matam-e-nalan kaghaz