ai dil is ka tujhe andaz-e-suKHan yaad nahin

ai dil is kā tujhe andāz-e-suḳhan yaad nahīñ

vo phirī aañkh vo māthe kī shikan yaad nahīñ

qaid-e-sayyād meñ jab se huuñ chaman yaad nahīñ

dost haiñ ahl-e-qafas ahl-e-vatan yaad nahīñ

hijr meñ dil ke hameñ dāġh-e-kuhan yaad nahīñ

muskurāte hue phūloñ kā chaman yaad nahīñ

vo ḳhunuk chāndnī rāteñ vo fazā aap aur maiñ

aur vaade vo lab-e-gañg-o-jaman yaad nahīñ

maiñ vo nākām musāfir huuñ jahāñ meñ jis ko

shām-e-ġhurbat ke sivā sub.h-e-vatan yaad nahīñ

aarzū dost kī bekār hai ġhurbat meñ 'rashīd'

aap ko hālat-e-yārān-e-vatan yaad nahīñ

ai dil is ka tujhe andaz-e-suKHan yaad nahin

wo phiri aankh wo mathe ki shikan yaad nahin

qaid-e-sayyaad mein jab se hun chaman yaad nahin

dost hain ahl-e-qafas ahl-e-watan yaad nahin

hijr mein dil ke hamein dagh-e-kuhan yaad nahin

muskuraate hue phulon ka chaman yaad nahin

wo KHunuk chandni raaten wo faza aap aur main

aur wade wo lab-e-gang-o-jaman yaad nahin

main wo nakaam musafir hun jahan mein jis ko

sham-e-ghurbat ke siwa subh-e-watan yaad nahin

aarzu dost ki bekar hai ghurbat mein 'rashid'

aap ko haalat-e-yaran-e-watan yaad nahin