ai dila hum hue paband-e-gham-e-yar ki tu

ai dilā ham hue pāband-e-ġham-e-yār ki tū

ab aziyyat meñ bhalā ham haiñ giraftār ki tū

ham to kahte the na āshiq ho ab itnā to batā

jā ke ham rote haiñ pahroñ pas-e-dīvār ki tū

haath kyuuñ ishq-e-butāñ se na uThāyā tū ne

kaf-e-afsos ham ab malte haiñ har baar ki tū

vahī mahfil hai vahī log vahī hai charchā

ab bhulā baiThe haiñ ham shakl-e-gunahgār ki tū

ham to kahte the ki lab se na lagā sāġhar-e-ishq

mai-e-andoh se ab ham hue sarshār ki tū

be-jagah jī kā phañsānā tujhe kyā thā darkār

ta.an o tashnī.a ke ab ham haiñ sazā-vār ki tū

vahshat-e-ishq burī hotī hai dekhā nādāñ

ham chale dasht ko ab chhoḌ ke ghar-bār ki tū

ātish-e-ishq ko siine meñ abas bhaḌkāyā

ab bhalā khīñchūñ huuñ maiñ āh-e-sharar-bār ki tū

ham to kahte the na hamrāh kisī ke lag chal

ab bhalā ham hue rusvā sar-e-bāzār ki tū

ġhaur kiije to ye mushkil hai zamīñ ai 'jur.at'

dekheñ ham is meñ kaheñ aur bhī ash.ār ki tū

ai dila hum hue paband-e-gham-e-yar ki tu

ab aziyyat mein bhala hum hain giraftar ki tu

hum to kahte the na aashiq ho ab itna to bata

ja ke hum rote hain pahron pas-e-diwar ki tu

hath kyun ishq-e-butan se na uThaya tu ne

kaf-e-afsos hum ab malte hain har bar ki tu

wahi mahfil hai wahi log wahi hai charcha

ab bhula baiThe hain hum shakl-e-gunahgar ki tu

hum to kahte the ki lab se na laga saghar-e-ishq

mai-e-andoh se ab hum hue sarshaar ki tu

be-jagah ji ka phansana tujhe kya tha darkar

tan o tashnia ke ab hum hain saza-war ki tu

wahshat-e-ishq buri hoti hai dekha nadan

hum chale dasht ko ab chhoD ke ghar-bar ki tu

aatish-e-ishq ko sine mein abas bhaDkaya

ab bhala khinchun hun main aah-e-sharar-bar ki tu

hum to kahte the na hamrah kisi ke lag chal

ab bhala hum hue ruswa sar-e-bazar ki tu

ghaur kije to ye mushkil hai zamin ai 'jurat'

dekhen hum is mein kahen aur bhi ashaar ki tu