ai dost mujhe soz-e-nihan mar na Dale

ai dost mujhe soz-e-nihāñ maar na Daale

ye nāla-e-shab āh-o-fuġhāñ maar na Daale

ik umr se paivast rag-e-jāñ hai magar ab

Dartā huuñ ki ye tīr-e-tapāñ maar na Daale

raa.ij hai zabāñ-bandī kā dastūr chaman meñ

bulbul ko kahīñ zabt-e-fuġhāñ maar na Daale

ḳhurshīd-e-qayāmat se sivā soz-e-darūñ hai

ai shaiḳh tujhe ishq-e-butāñ maar na Daale

tū ḳhvāb hai ehsās hai naġhma hai ki gul hai

ye kashmakash-e-vahm-o-gumāñ maar na Daale

but-ḳhāne meñ jaatā hai baḌe shauq se lekin

zāhid ko kahīñ husn-e-butāñ maar na Daale

betābī-e-dil kī ye davā ḳhuub hai lekin

pahlū meñ ye sharbat kī dukāñ maar na Daale

had se na guzar jaa.e tirī tarz-e-taġhāful

furqat tirī ai jān-e-jahāñ maar na Daale

baiThā huuñ tire sāya-e-gesū meñ magar ab

Dartā huuñ ki ye rāhat-e-jāñ maar na Daale

ab daulat-e-dil haar ke rotā hai 'muzaffar'

muflis ko ye ehsās-e-ziyāñ maar na Daale

ai dost mujhe soz-e-nihan mar na Dale

ye nala-e-shab aah-o-fughan mar na Dale

ek umr se paiwast rag-e-jaan hai magar ab

Darta hun ki ye tir-e-tapan mar na Dale

raij hai zaban-bandi ka dastur chaman mein

bulbul ko kahin zabt-e-fughan mar na Dale

KHurshid-e-qayamat se siwa soz-e-darun hai

ai shaiKH tujhe ishq-e-butan mar na Dale

tu KHwab hai ehsas hai naghma hai ki gul hai

ye kashmakash-e-wahm-o-guman mar na Dale

but-KHane mein jata hai baDe shauq se lekin

zahid ko kahin husn-e-butan mar na Dale

betabi-e-dil ki ye dawa KHub hai lekin

pahlu mein ye sharbat ki dukan mar na Dale

had se na guzar jae teri tarz-e-taghaful

furqat teri ai jaan-e-jahan mar na Dale

baiTha hun tere saya-e-gesu mein magar ab

Darta hun ki ye rahat-e-jaan mar na Dale

ab daulat-e-dil haar ke rota hai 'muzaffar'

muflis ko ye ehsas-e-ziyan mar na Dale