ai dost teri baat sahar-KHez bahut hai

ai dost tirī baat sahar-ḳhez bahut hai

par tarz-e-takallum tirā ḳhūñ-rez bahut hai

gum-sum sā khaḌā hai koī darvāza-e-dil par

is shaam kā manzar to dil-āvez bahut hai

mahfil meñ tire hone se hai rañg pe mausam

ahvāl-e-ḳhās-o-ām tarab-ḳhez bahut hai

ik shaḳhs jo uljhā hai na.ī fikr-o-nazar meñ

vo sāhib-e-ḳhush-fahm hai aur tez bahut hai

jo baat tū kahtā hai vahī baat ho shāyad

lekin tirī ye baat ġham-añgez bahut hai

bhaḌke hue sho.ale hī matā-e-dil-o-jāñ haiñ

'ālam' tire kūche meñ havā tez bahut hai

ai dost teri baat sahar-KHez bahut hai

par tarz-e-takallum tera KHun-rez bahut hai

gum-sum sa khaDa hai koi darwaza-e-dil par

is sham ka manzar to dil-awez bahut hai

mahfil mein tere hone se hai rang pe mausam

ahwal-e-KHas-o-am tarab-KHez bahut hai

ek shaKHs jo uljha hai nai fikr-o-nazar mein

wo sahib-e-KHush-fahm hai aur tez bahut hai

jo baat tu kahta hai wahi baat ho shayad

lekin teri ye baat gham-angez bahut hai

bhaDke hue shoale hi mata-e-dil-o-jaan hain

'alam' tere kuche mein hawa tez bahut hai