ai gham-e-zist tere chahne wale kitne

ai ġham-e-zīst tire chāhne vaale kitne

pī ga.e zahr se labrez piyāle kitne

ham siyah-baḳht sahī phir bhī hamīñ ne ai dost

kiye taḳhlīq añdheroñ se ujāle kitne

pāsbān-e-mah-o-ḳhurshīd hī ban kar tum ne

vaqt ke gosha-e-tārīk ujāle kitne

ai nigahbān-e-haram ham ko ḳhabar hai is kī

haiñ nihāñ terī nigāhoñ meñ shivāle kitne

shukriya aap kī īsā-nafasī kā lekin

paḌ ga.e aur mirī jaan ke laale kitne

aur kuchh roz abhī zulm ravā rakhnā thā

hausle tum ne abhī dil ke nikāle kitne

kitne to nān-e-javīñ ko bhī taras jaate haiñ

hazm kar jaate haiñ sone ke nivāle kitne

tum to karte rahe nazzāra-e-tūfāñ hī 'atīq'

ho ga.e shauq se tūfāñ ke havāle kitne

ai gham-e-zist tere chahne wale kitne

pi gae zahr se labrez piyale kitne

hum siyah-baKHt sahi phir bhi hamin ne ai dost

kiye taKHliq andheron se ujale kitne

pasban-e-mah-o-KHurshid hi ban kar tum ne

waqt ke gosha-e-tarik ujale kitne

ai nigahban-e-haram hum ko KHabar hai is ki

hain nihan teri nigahon mein shiwale kitne

shukriya aap ki isa-nafasi ka lekin

paD gae aur meri jaan ke lale kitne

aur kuchh roz abhi zulm rawa rakhna tha

hausle tum ne abhi dil ke nikale kitne

kitne to nan-e-jawin ko bhi taras jate hain

hazm kar jate hain sone ke niwale kitne

tum to karte rahe nazzara-e-tufan hi 'atiq'

ho gae shauq se tufan ke hawale kitne