ai ghazal teri nazar jab se utari humne

ai ġhazal terī nazar jab se utārī ham ne

rakh diyā naam tirā rāj-kumārī ham ne

is liye ġham ko banā rakkhā hai apnā sāthī

tujh ko de dī hai ḳhushī saarī kī saarī ham ne

dil ke jazbāt zamāne ko batāne ke liye

sher-goī kā safar rakkhā hai jaarī ham ne

dard-e-furqat meñ na so pāoge ab chain se tum

niiñd āñkhoñ se churā lī hai tumhārī ham ne

jo kahā tujh se akele meñ kahā ai zālim

aabrū kab tirī mahfil meñ utārī ham ne

naqd hai ishq kā saudā ye huā jab ma.alūm

is meñ rakkhī hī nahīñ koī udhārī ham ne

haiñ kahāñ jin pe adab kā thā kabhī dār-o-madār

ab to stage pe dekhe haiñ madārī ham ne

ye haqīqat hai tumheñ koī nahīñ pūchhegā

kyā karoge jo kabhī toḌ dī yaarī ham ne

un se bichhḌe haiñ to phir niiñd na aa.ī 'rahbar'

taare gin gin ke har ik raat guzārī ham ne

ai ghazal teri nazar jab se utari hum ne

rakh diya nam tera raj-kumari hum ne

is liye gham ko bana rakkha hai apna sathi

tujh ko de di hai KHushi sari ki sari hum ne

dil ke jazbaat zamane ko batane ke liye

sher-goi ka safar rakkha hai jari hum ne

dard-e-furqat mein na so paoge ab chain se tum

nind aankhon se chura li hai tumhaari hum ne

jo kaha tujh se akele mein kaha ai zalim

aabru kab teri mahfil mein utari hum ne

naqd hai ishq ka sauda ye hua jab malum

is mein rakkhi hi nahin koi udhaari hum ne

hain kahan jin pe adab ka tha kabhi dar-o-madar

ab to stage pe dekhe hain madari hum ne

ye haqiqat hai tumhein koi nahin puchhega

kya karoge jo kabhi toD di yari hum ne

un se bichhDe hain to phir nind na aai 'rahbar'

tare gin gin ke har ek raat guzari hum ne