ai ham-nafaso dard ki ye raat kaDi hai

ai ham-nafaso dard kī ye raat kaḌī hai

sar thāme hue dil meñ kahīñ aas khaḌī hai

ham-rañg-e-shafaq hai dil-e-ma.asūm kā aalam

vo daur-e-tamanna kī sahar chup ke khaḌī hai

ujlī thī tirī yaad kī ye zard sī pattī

ḳhākistar-e-ayyām meñ ḳhāmosh paḌī hai

un āñkhoñ meñ phir dekhā hayā rañg-e-tabassum

raste meñ qazā se mirī phir aañkh laḌī hai

phir dast-e-sabā ne vo gajar aaj bajāyā

palkoñ pe phir ik baar mirī niiñd uḌī hai

phir shahr-e-ġhazālāñ meñ ġhazal laayā hai 'qaisar'

sūrat-kada-e-husn meñ phir dhuum paḌī hai

ai ham-nafaso dard ki ye raat kaDi hai

sar thame hue dil mein kahin aas khaDi hai

ham-rang-e-shafaq hai dil-e-masum ka aalam

wo daur-e-tamanna ki sahar chup ke khaDi hai

ujli thi teri yaad ki ye zard si patti

KHakistar-e-ayyam mein KHamosh paDi hai

un aankhon mein phir dekha haya rang-e-tabassum

raste mein qaza se meri phir aankh laDi hai

phir dast-e-saba ne wo gajar aaj bajaya

palkon pe phir ek bar meri nind uDi hai

phir shahr-e-ghazalan mein ghazal laya hai 'qaisar'

surat-kada-e-husn mein phir dhum paDi hai