ai ham-safir talKHi-e-tarz-e-bayan na chhoD

ai ham-safīr talḳhī-e-tarz-e-bayāñ na chhoḌ

tū gāliyāñ diye jā hameñ gāliyāñ na chhoḌ

vā'iz butoñ ke chāh-e-zaqan kā bayāñ na chhoḌ

varna kahīñ na pā.egā paanī kuaañ na chhoḌ

pahuñchā de makr-o-kaid ko hadd-e-kamāl tak

ai dost nā-tamām koī dāstāñ na chhoḌ

in rahbarān-e-qaum se yā-rab bachā mujhe

char leñgī sab chaman mirā ye bakriyāñ na chhoḌ

phūloñ se bhar sake na agar dāman-e-havas

sehn-e-chaman kī ghaas bhī ai bāġhbāñ na chhoḌ

be-vasvasa ġharīboñ pe bhī haath saaf kar

mil jaa.eñ to javār kī bhī roTiyāñ na chhoḌ

dīvānoñ ke to jaib o girebāñ kā zikr kyā

gar dhajjiyāñ bhī haath lageñ mehrbāñ na chhoḌ

insāniyat meñ baaqī hai saffāk dam abhī

ik haath kas ke aur use nīm-jāñ na chhoḌ

zālim usī ne naak meñ dam kar diyā tirā

ragḌe jā ḳhuub gardan-e-amn-o-amāñ na chhoḌ

ab zulm meñ izāfa na kar bānī-e-jafā

qasr-e-sitam ke aage koī sā.ebāñ na chhoḌ

ranj-o-alam kā zā.iqa ik roz tū bhī chakh

ye ḳhaas jaunpur kī tū mūliyāñ na chhoḌ

ai 'shauq' ye jafā.eñ haiñ kyā ye sitam haiñ kyā

har imtihāñ meñ baiTh koī imtihāñ na chhoḌ

ai ham-safir talKHi-e-tarz-e-bayan na chhoD

tu galiyan diye ja hamein galiyan na chhoD

wa'iz buton ke chah-e-zaqan ka bayan na chhoD

warna kahin na paega pani kuan na chhoD

pahuncha de makr-o-kaid ko hadd-e-kamal tak

ai dost na-tamam koi dastan na chhoD

in rahbaran-e-qaum se ya-rab bacha mujhe

char lengi sab chaman mera ye bakriyan na chhoD

phulon se bhar sake na agar daman-e-hawas

sehn-e-chaman ki ghas bhi ai baghban na chhoD

be-waswasa gharibon pe bhi hath saf kar

mil jaen to jawar ki bhi roTiyan na chhoD

diwanon ke to jaib o gireban ka zikr kya

gar dhajjiyan bhi hath lagen mehrban na chhoD

insaniyat mein baqi hai saffak dam abhi

ek hath kas ke aur use nim-jaan na chhoD

zalim usi ne nak mein dam kar diya tera

ragDe ja KHub gardan-e-amn-o-aman na chhoD

ab zulm mein izafa na kar bani-e-jafa

qasr-e-sitam ke aage koi saeban na chhoD

ranj-o-alam ka zaiqa ek roz tu bhi chakh

ye KHas jaunpur ki tu muliyan na chhoD

ai 'shauq' ye jafaen hain kya ye sitam hain kya

har imtihan mein baiTh koi imtihan na chhoD