ai husn-e-azal teri kya shan nirali hai

ai husn-e-azal terī kyā shaan nirālī hai

dekhā to jalālī hai samjhā to jalālī hai

hai zarf ye jo aalī mansab bhī vo aalī hai

bhar degā mirā saaqī paimāna jo ḳhālī hai

duniyā-e-mohabbat meñ kyā koī duā lī hai

tum ne kisī āshiq kī hasrat bhī nikālī hai

rahtā hai ye jis dhun meñ duniyā se nirālī hai

dīvāna mohabbat kā ik mard-e-ḳhayālī hai

sūrat sī badal dī hai kuchh naqsh-e-mohabbat ne

tasvīr tirī ham ne ab dil meñ jamā lī hai

huuñ zabt-e-mohabbat kā ḳhūgar to magar aksar

machlī hai tabī.at to mushkil se sañbhālī hai

rasm-o-rah-e-hastī kā pāband nahīñ āshiq

kahte haiñ junūñ jis ko āzād-ḳhayālī hai

tahzīb se fāriġh hai ab mard-e-ḳharābātī

ta.amīr karegā phir buniyād to Daalī hai

ik vahshat-e-hastī hai dhandā mujhe duniyā kā

kuchh dhuul uḌānī hai kuchh dhuul uḌā lī hai

paa.ī hai nazar ham ne saaqī kī ināyat kī

uqbā bhī banā leñge duniyā to banā lī hai

hai gird tamāshā sā ik ġhol-e-bayābāñ kā

sahrā meñ bhī ham ne to bastī sī basā lī hai

andāz-e-bayāñ tū ne sīkhā ye nayā 'shākir'

ab tarz-e-nigārish meñ āzād-ḳhayālī hai

ai husn-e-azal teri kya shan nirali hai

dekha to jalali hai samjha to jalali hai

hai zarf ye jo aali mansab bhi wo aali hai

bhar dega mera saqi paimana jo KHali hai

duniya-e-mohabbat mein kya koi dua li hai

tum ne kisi aashiq ki hasrat bhi nikali hai

rahta hai ye jis dhun mein duniya se nirali hai

diwana mohabbat ka ek mard-e-KHayali hai

surat si badal di hai kuchh naqsh-e-mohabbat ne

taswir teri hum ne ab dil mein jama li hai

hun zabt-e-mohabbat ka KHugar to magar aksar

machli hai tabiat to mushkil se sanbhaali hai

rasm-o-rah-e-hasti ka paband nahin aashiq

kahte hain junun jis ko aazad-KHayali hai

tahzib se farigh hai ab mard-e-KHarabaati

tamir karega phir buniyaad to Dali hai

ek wahshat-e-hasti hai dhanda mujhe duniya ka

kuchh dhul uDani hai kuchh dhul uDa li hai

pai hai nazar hum ne saqi ki inayat ki

uqba bhi bana lenge duniya to bana li hai

hai gird tamasha sa ek ghol-e-bayaban ka

sahra mein bhi hum ne to basti si basa li hai

andaz-e-bayan tu ne sikha ye naya 'shakir'

ab tarz-e-nigarish mein aazad-KHayali hai