ai husn-e-KHush-sifat mere sath sath chal

ai husn-e-ḳhush-sifāt mire saath saath chal

karnī hai tujh se baat mire saath saath chal

sāhil kī bhīgī ret pe kuchh duur nange paañv

hāthoñ meñ Daale haath mire saath saath chal

ik shab guzārnī hai ġhazal ke dayār meñ

sham.a-e-tasavvurāt mire saath saath chal

sūraj to e'tibār ke qābil nahīñ rahā

ai pūrnimā kī raat mire saath saath chal

har shaḳhs vāsnā kā pujārī hai shahr meñ

kamsin hai terī zaat mire saath saath chal

kab se maiñ kar rahā huuñ tire dar pe iltijā

ab maan bhī jā baat mire saath saath chal

le jā rahe haiñ log mujhe qabr-gāh meñ

aa vājib-uz-zakāt mire saath saath chal

'hasrat' ibādatoñ ke tasavvuf meñ ho ke gum

ka.abe se somnāt mere saath saath chal

ai husn-e-KHush-sifat mere sath sath chal

karni hai tujh se baat mere sath sath chal

sahil ki bhigi ret pe kuchh dur nange panw

hathon mein Dale hath mere sath sath chal

ek shab guzarni hai ghazal ke dayar mein

shama-e-tasawwuraat mere sath sath chal

suraj to e'tibar ke qabil nahin raha

ai purnima ki raat mere sath sath chal

har shaKHs wasna ka pujari hai shahr mein

kamsin hai teri zat mere sath sath chal

kab se main kar raha hun tere dar pe iltija

ab man bhi ja baat mere sath sath chal

le ja rahe hain log mujhe qabr-gah mein

aa wajib-uz-zakat mere sath sath chal

'hasrat' ibaadaton ke tasawwuf mein ho ke gum

kabe se somnat mere sath sath chal