ai ibn-e-iztirab dil-e-na-subur sabr

ai ibn-e-iztirāb dil-e-nā-subūr sabr

taklīf meñ hai bā.is-e-kaif-o-surūr sabr

chhaT kar rahegī tīrgī ik din gurez kī

phūTegā iltifāt-o-mohabbat kā nuur sabr

āñkhoñ meñ tairte haiñ abhī tak ka.ī hurūf

likkhā thā us ne ashk se bainassutūr sabr

maiñ kyā karūñ ki tum ko na ho barhamī kabhī

kis tarah dil ko aa.e tumhāre huzūr sabr

tum se thā duur duur to sābir thā saḳht thā

shīshe kī tarah pal meñ huā chuur chuur sabr

donoñ hī e'tidāl pe 'rāġhib' na rah sake

thā merā iztirāb to un kā qusūr sabr

ai ibn-e-iztirab dil-e-na-subur sabr

taklif mein hai bais-e-kaif-o-surur sabr

chhaT kar rahegi tirgi ek din gurez ki

phuTega iltifat-o-mohabbat ka nur sabr

aankhon mein tairte hain abhi tak kai huruf

likkha tha us ne ashk se bainassutur sabr

main kya karun ki tum ko na ho barhami kabhi

kis tarah dil ko aae tumhaare huzur sabr

tum se tha dur dur to sabir tha saKHt tha

shishe ki tarah pal mein hua chur chur sabr

donon hi e'tidal pe 'raghib' na rah sake

tha mera iztirab to un ka qusur sabr