اے عشق اب تو میں ترے قابل نہیں رہا

اے عشق اب تو میں ترے قابل نہیں رہا

جس دل پہ ناز تھا مجھے وہ دل نہیں رہا

اے خضر راہ چل مجھے لے چل جہاں چلے

اب مجھ کو ہوش جادۂ منزل نہیں رہا

اللہ ہو خیر قیس کی بربادیوں کی خیر

لیلیٰ پہ آج پردۂ محمل نہیں رہا

تیغ جفا اٹھا ارے قاتل اٹھا اٹھا

اب صبر جذب الفت کامل نہیں رہا

قاتل ترے تو وار نے کر ہی دیا غضب

بسمل تڑپ کے چل دیا بسمل نہیں رہا

میں کس لئے ہوں کوشاں مری کشتیٔ وفا

طوفان وہ اٹھا ہے کہ ساحل نہیں رہا

اے پریمؔ اب نہ پوچھ غم دل کی داستاں

اب داستان غم نہ رہی دل نہیں رہا