ai ishq ab to main tere qabil nahin raha

ai ishq ab to maiñ tire qābil nahīñ rahā

jis dil pe naaz thā mujhe vo dil nahīñ rahā

ai ḳhizr-e-rāh chal mujhe le chal jahāñ chale

ab mujh ko hosh-e-jāda-e-manzil nahīñ rahā

allah ho ḳhair qais kī barbādiyoñ kī ḳhair

lailā pe aaj parda-e-mahmil nahīñ rahā

teġh-e-jafā uThā are qātil uThā uThā

ab sabr-e-jazb-e-ulfat-e-kāmil nahīñ rahā

qātil tire to vaar ne kar hī diyā ġhazab

bismil taḌap ke chal diyā bismil nahīñ rahā

maiñ kis liye huuñ koshāñ mirī kashtī-e-vafā

tūfān vo uThā hai ki sāhil nahīñ rahā

ai 'prem' ab na pūchh ġham-e-dil kī dāstāñ

ab dāstān-e-ġham na rahī dil nahīñ rahā

ai ishq ab to main tere qabil nahin raha

jis dil pe naz tha mujhe wo dil nahin raha

ai KHizr-e-rah chal mujhe le chal jahan chale

ab mujh ko hosh-e-jada-e-manzil nahin raha

allah ho KHair qais ki barbaadiyon ki KHair

laila pe aaj parda-e-mahmil nahin raha

tegh-e-jafa uTha are qatil uTha uTha

ab sabr-e-jazb-e-ulfat-e-kaamil nahin raha

qatil tere to war ne kar hi diya ghazab

bismil taDap ke chal diya bismil nahin raha

main kis liye hun koshan meri kashti-e-wafa

tufan wo uTha hai ki sahil nahin raha

ai 'prem' ab na puchh gham-e-dil ki dastan

ab dastan-e-gham na rahi dil nahin raha