اے عشق رخ لالہ و شبنم کی تری دے

اے عشق رخ لالہ و شبنم کی تری دے

زخموں کو مرے لطف گداز سحری دے

نالہ کش حالات ہوں مجبور فغاں ہوں

توفیق شکیبائی کرب جگری دے

نادیدۂ منزل ہوں اندھیری ہی نظر میں

جگنو کو مذاق شغف ہم سفری دے

میں اب بھی دکھا سکتا ہوں پرواز کا عالم

دنیا نہ مجھے طعنۂ بے بال و پری دے

تذلیل قناعت تو گوارا نہیں لیکن

وہ کیا کرے قدرت جسے دریوزہ گری دے

ان سوکھے درختوں پہ گزارا کروں کب تک

اے موسم گل مجھ کو کوئی شاخ ہری دے

دل لے کے چلا ہے طرف شہر نگاراں

اب تو مرے اللہ مجھے خوش نظری دے

محروم بصیرت ہے فن شعر میں طرفہؔ

اس کور ہنر کو سند دیدہ وری دے