ai ishq ruKH-e-lala-o-shabnam ki tari de

ai ishq ruḳh-e-lāla-o-shabnam kī tarī de

zaḳhmoñ ko mire lutf-e-gudāz-e-saharī de

nāla-kash-e-hālāt huuñ majbūr-e-fuġhāñ huuñ

taufīq-e-shakebā.ī-e-karb-e-jigarī de

nādīda-e-manzil huuñ añdherī hī nazar meñ

jugnū ko mazāq-e-shaġhaf-e-ham-safarī de

maiñ ab bhī dikhā saktā huuñ parvāz kā aalam

duniyā na mujhe ta.ana-e-be-bāl-o-parī de

tazlīl-e-qanā.at to gavārā nahīñ lekin

vo kyā kare qudrat jise daryūza-garī de

in sūkhe daraḳhtoñ pe guzārā karūñ kab tak

ai mausam-e-gul mujh ko koī shāḳh harī de

dil le ke chalā hai taraf-e-shahr-e-nigārāñ

ab to mire allāh mujhe ḳhush-nazarī de

mahrūm-e-basīrat hai fan-e-sher meñ 'turfa'

is kor-hunar ko sanad-e-dīda-varī de

ai ishq ruKH-e-lala-o-shabnam ki tari de

zaKHmon ko mere lutf-e-gudaz-e-sahari de

nala-kash-e-haalat hun majbur-e-fughan hun

taufiq-e-shakebai-e-karb-e-jigari de

nadida-e-manzil hun andheri hi nazar mein

jugnu ko mazaq-e-shaghaf-e-ham-safari de

main ab bhi dikha sakta hun parwaz ka aalam

duniya na mujhe tana-e-be-baal-o-pari de

tazlil-e-qanaat to gawara nahin lekin

wo kya kare qudrat jise daryuza-gari de

in sukhe daraKHton pe guzara karun kab tak

ai mausam-e-gul mujh ko koi shaKH hari de

dil le ke chala hai taraf-e-shahr-e-nigaran

ab to mere allah mujhe KHush-nazari de

mahrum-e-basirat hai fan-e-sher mein 'turfa'

is kor-hunar ko sanad-e-dida-wari de