اے جنوں ہے گلشن ایجاد ویرانہ میرا

اے جنوں ہے گلشن ایجاد ویرانہ میرا

کس کا دیوانہ ہوں اک عالم ہے دیوانہ میرا

باعث آرائش گیتی ہے ویرانہ میرا

تل مگر روئے زمیں کا ہے سیہ خانہ میرا

ہوں غش روز ازل سے جلوۂ دیدار پر

طور کی تقریر تھی گویا اک افسانہ میرا

بات چھیڑی ہے تو کہنے دیجئے افسون زلف

نیند اچٹی ہے تو سن لیجے کچھ افسانہ میرا

اے نشائے حرص رفعت خوب ہے چکر دئے

آسماں کے ساتھ گردش میں ہے پیمانہ میرا

میں وہ کشت نا مرادی ہوں زمانہ میں کہ ہے

برق خرمن سوز کا مشتاق ہر دانہ میرا

ہے سرور بادۂ الفت بہار بے ہشی

بے خودیٔ دو جہاں ہے دور پیمانہ میرا

سب ہیں جیتے جی کے دنیا میں تعلق بے خبر

کون ہے تیرا یگانہ کون بیگانہ میرا

ہے سرور بادۂ رنگیں سخن سازی میری

موج بحر مے ہے شعلہؔ شعر مستانہ میرا