ai kaenat tere sahaare hamin to hain

ai kā.enāt tere sahāre hamīñ to haiñ

tere nazar-navāz ishāre hamīñ to haiñ

amvāj-e-husn-o-ishq kā irfāñ hamīñ se hai

dariyā-e-zindagī ke kināre hamīñ to haiñ

tūfān-e-hādsāt ke ḳhāliq tumhīñ to ho

tūfān jin ko paar utāre hamīñ to haiñ

ham se sivā hayāt ko samjhegā aur kaun

un kī navāzishāt ke maare hamīñ to haiñ

ye aur baat hai ki tumheñ ilm hī nahīñ

varna bhare jahāñ meñ tumhāre hamīñ to haiñ

duniyā-e-zindagī kā nazāra kareñ to kyā

duniyā-e-zindagī ke nazāre hamīñ to haiñ

'parvez' shā.irī kī harārat hamīñ se hai

ilm-o-adab ke shoḳh sharāre hamīñ to haiñ

ai kaenat tere sahaare hamin to hain

tere nazar-nawaz ishaare hamin to hain

amwaj-e-husn-o-ishq ka irfan hamin se hai

dariya-e-zindagi ke kinare hamin to hain

tufan-e-hadsat ke KHaliq tumhin to ho

tufan jin ko par utare hamin to hain

hum se siwa hayat ko samjhega aur kaun

un ki nawazishat ke mare hamin to hain

ye aur baat hai ki tumhein ilm hi nahin

warna bhare jahan mein tumhaare hamin to hain

duniya-e-zindagi ka nazara karen to kya

duniya-e-zindagi ke nazare hamin to hain

'parwez' shairi ki hararat hamin se hai

ilm-o-adab ke shoKH sharare hamin to hain