ai kash ek din KHud se ho guftugu

ai kaash ek din ḳhud se ho guftugū

muddat se hai mujhe apnī hī justujū

ḳhatre meñ paḌ ga.ī ab dil kī aabrū

ik dhund karb kī chhā.ī hai chār-sū

sab ḳhatm kar diye jis se ta'alluqāt

kartā hai rāt-din vo merī guftugū

mere qarīb tum aanā na bhuul kar

jhulsā na de tumheñ mere badan kī lū

jis se bhī baat kī us ko lagā.e zaḳhm

phir bhī na ho sakā merā koī adū

ik ābla-qadam guzrā hai shāyad aaj

zaḳhmī haiñ rāste patthar lahū lahū

lalkār kar mujhe maidān-e-jang se

pīchhe vo haT gayā aaya na dū-badū

kitnā ajiib ye merā tazād hai

ThanDā mizāj hai aur garm hai lahū

ho kar na be-jhijak rāhoñ meñ ghūmnā

phirte haiñ din meñ bhī aaseb kū-ba-kū

'najmī' ke qalb kā aalam ajiib hai

shahr-e-hayāt meñ marne kī aarzū

ai kash ek din KHud se ho guftugu

muddat se hai mujhe apni hi justuju

KHatre mein paD gai ab dil ki aabru

ek dhund karb ki chhai hai chaar-su

sab KHatm kar diye jis se ta'alluqat

karta hai raat-din wo meri guftugu

mere qarib tum aana na bhul kar

jhulsa na de tumhein mere badan ki lu

jis se bhi baat ki us ko lagae zaKHm

phir bhi na ho saka mera koi adu

ek aabla-qadam guzra hai shayad aaj

zaKHmi hain raste patthar lahu lahu

lalkar kar mujhe maidan-e-jang se

pichhe wo haT gaya aaya na du-badu

kitna ajib ye mera tazad hai

ThanDa mizaj hai aur garm hai lahu

ho kar na be-jhijak rahon mein ghumna

phirte hain din mein bhi aaseb ku-ba-ku

'najmi' ke qalb ka aalam ajib hai

shahr-e-hayat mein marne ki aarzu