ai kash koi aae KHaridar ki tarah

ai kaash koī aa.e ḳharīdār kī tarah

apnā bhī dil hai misr ke bāzār kī tarah

jangal kī aag se vo kisī taur kam nahīñ

jo bhī zabān chaltī hai talvār kī tarah

kal tak jo shahryār thā aur bā-vaqār thā

ab jī rahā hai zindagī nādār kī tarah

sab dekhte haiñ aap ke a.amāl raat din

kiije na baat sāhib-e-kirdār kī tarah

guzrā hai ham pe bārhā aalam judā.ī kā

jaage haiñ ham bhī dīda-e-bedār kī tarah

kahne ko ġham-gusār haiñ is shahr meñ bahut

miltā nahīñ magar koī ġham-ḳhvār kī tarah

shāyad hamāre shahr kā mausam ḳharāb hai

jis ko bhī dekho chaltā hai bīmār kī tarah

do pal sukūñ bahut hai masāfat meñ dosto

vo mehrbāñ haiñ sāya-e-dīvār kī tarah

kahte haiñ log us ke hue valvale tamām

jo jī rahā thā zindagī zardār kī tarah

ek ek qatra ḳhuuñ kā farāz-e-salīb se

barsā hai dil pe abr-e-guhar-bār kī tarah

zaḳhmoñ kī fasl apne badan meñ sameT kar

dhartī ko kar gayā vo saman-zār kī tarah

us se hisāb-e-zindagī māñgegā kaun 'shauq'

jiitā rahā jo shahr meñ nādār kī tarah

ai kash koi aae KHaridar ki tarah

apna bhi dil hai misr ke bazar ki tarah

jangal ki aag se wo kisi taur kam nahin

jo bhi zaban chalti hai talwar ki tarah

kal tak jo shahryar tha aur ba-waqar tha

ab ji raha hai zindagi nadar ki tarah

sab dekhte hain aap ke aamal raat din

kije na baat sahib-e-kirdar ki tarah

guzra hai hum pe barha aalam judai ka

jage hain hum bhi dida-e-bedar ki tarah

kahne ko gham-gusar hain is shahr mein bahut

milta nahin magar koi gham-KHwar ki tarah

shayad hamare shahr ka mausam KHarab hai

jis ko bhi dekho chalta hai bimar ki tarah

do pal sukun bahut hai masafat mein dosto

wo mehrban hain saya-e-diwar ki tarah

kahte hain log us ke hue walwale tamam

jo ji raha tha zindagi zardar ki tarah

ek ek qatra KHun ka faraaz-e-salib se

barsa hai dil pe abr-e-guhar-bar ki tarah

zaKHmon ki fasl apne badan mein sameT kar

dharti ko kar gaya wo saman-zar ki tarah

us se hisab-e-zindagi mangega kaun 'shauq'

jita raha jo shahr mein nadar ki tarah