ai kash na hota ye asar aah-e-rasa mein

ai kaash na hotā ye asar āh-e-rasā meñ

ik barhamī aatī hai nazar zulf-e-dotā meñ

dāḳhil jo huā halqa-e-taslīm-o-razā meñ

paatā nahīñ vo farq sazā aur jazā meñ

us anjuman-e-nāz meñ kyā kaam qazā kā

huuñ saikḌoñ andāz jahāñ ek adā meñ

me.arāj-e-mohabbat meñ huiiñ lāzim-o-malzūm

hai ek kashish merī vafā terī jafā meñ

sābit ye huā dard-e-mohabbat ke asar se

tāsīr duā meñ hai na tāsīr davā meñ

dil jhukte haiñ aise ki kabhī sar nahīñ uThte

ushshāq ne kuchh paayā hai naqsh-e-kaf-e-pā meñ

ik uqda hai jo khul nahīñ saktā hai kisī se

ye kis ne girah Daalī tire band-e-qabā meñ

'beḳhud' kā nishāñ pūchhte ho qāfile vaalo

ik gard sī uḌtī huī dekhā hai havā meñ

ai kash na hota ye asar aah-e-rasa mein

ek barhami aati hai nazar zulf-e-dota mein

daKHil jo hua halqa-e-taslim-o-raza mein

pata nahin wo farq saza aur jaza mein

us anjuman-e-naz mein kya kaam qaza ka

hun saikDon andaz jahan ek ada mein

mearaj-e-mohabbat mein huin lazim-o-malzum

hai ek kashish meri wafa teri jafa mein

sabit ye hua dard-e-mohabbat ke asar se

tasir dua mein hai na tasir dawa mein

dil jhukte hain aise ki kabhi sar nahin uThte

ushshaq ne kuchh paya hai naqsh-e-kaf-e-pa mein

ek uqda hai jo khul nahin sakta hai kisi se

ye kis ne girah Dali tere band-e-qaba mein

'beKHud' ka nishan puchhte ho qafile walo

ek gard si uDti hui dekha hai hawa mein