اے خامشی ترا اظہار اب زیادہ ہو

اے خامشی ترا اظہار اب زیادہ ہو

بڑھے مسرتیں غم کی طلب زیادہ ہو

مرا نصیب مرے سامنے ہے چارہ گر

اب انتظار کہ آزار کب زیادہ ہو

وہ لوٹ آیا کرے دن ڈھلے نشیمن میں

شمار اس میں پرندوں کا ڈھب زیادہ ہو

بڑے سکون میں دکھتی ہیں یہ بھی ممکن ہے

اداسیوں کے گھروں میں طرب زیادہ ہو

اس آئنے نے ہزاروں دلوں کو توڑا ہے

سو ٹوٹنے کا اسے خوف اب زیادہ ہو

نکلنا ڈھونڈنے اس روز عشق کو میراؔ

تمہارا جسم ہو کم روح جب زیادہ ہو