ai KHuda aisa karishma ho jae

ai ḳhudā aisā karishma ho jaa.e

dil kā sahrā mirā dariyā ho jaa.e

āñsuo tum zarā mohtāt raho

ishq kā raaz na ifshā ho jaa.e

duur ho jā.egī barsoñ kī thakan

us kī zulfoñ kā jo saayā ho jaa.e

sar jahāñ fart-e-junūñ meñ rakh duuñ

vo zamīñ dāman-e-ka.aba ho jaa.e

zaḳhm baḳhshe haiñ jo us ne mujh ko

kaun chāhegā ki achchhā ho jaa.e

us kā parde hī meñ rahnā achchhā

parda uTh jaa.e to kyā kyā ho jaa.e

un kī har baat sunī jaatī hai

maiñ jo bolūñ to tamāshā ho jaa.e

phir uThī jhuum ke mad.hosh ghaTā

aaj saaqī se taqāzā ho jaa.e

aadmī hai to ḳhatā bhī hogī

aadmī kaise farishta ho jaa.e

us ke aiboñ ko chhupā le ai 'shād'

kyā zarūrī hai ki charchā ho jaa.e

ai KHuda aisa karishma ho jae

dil ka sahra mera dariya ho jae

aansuo tum zara mohtat raho

ishq ka raaz na ifsha ho jae

dur ho jaegi barson ki thakan

us ki zulfon ka jo saya ho jae

sar jahan fart-e-junun mein rakh dun

wo zamin daman-e-kaba ho jae

zaKHm baKHshe hain jo us ne mujh ko

kaun chahega ki achchha ho jae

us ka parde hi mein rahna achchha

parda uTh jae to kya kya ho jae

un ki har baat suni jati hai

main jo bolun to tamasha ho jae

phir uThi jhum ke madhosh ghaTa

aaj saqi se taqaza ho jae

aadmi hai to KHata bhi hogi

aadmi kaise farishta ho jae

us ke aibon ko chhupa le ai 'shad'

kya zaruri hai ki charcha ho jae