ai KHuda-e-pak rabb-e-zul-jalal

ai ḳhudā-e-pāk rabb-e-zul-jalāl

zindagī ko maut ke Dar se nikāl

chhoḌ ai nekī-zada pichhlī misāl

jazba-e-nekī bhī ab dariyā meñ Daal

ik ajab sī kaifiyat hai in dinoñ

na ḳhushī hai aur na koī malāl

zindagī terā muqaddar maut hai

roz ham karte haiñ terī dekh bhaal

ik to ye dozaḳh milā īñdhan talab

aur is par justujū rizq-e-halāl

jis jagah par ḳhatm hoñ sab rāste

phir vahīñ se ik nayā rasta nikāl

ye batā ravāq ke ma.anī haiñ kyā

bhuuk kī shiddat ye kartī hai savāl

mere jaise shā.iroñ kī zindagī

na to maazī hai na mustaqbil na haal

zindagī meñ sab ke sab uljhe hue

zindagī hai bhī bahut mushkil savāl

chhoḌ de ab tīr-o-tarkash chhoḌ de

guftugū se mas.ale kā hal nikāl

ai KHuda-e-pak rabb-e-zul-jalal

zindagi ko maut ke Dar se nikal

chhoD ai neki-zada pichhli misal

jazba-e-neki bhi ab dariya mein Dal

ek ajab si kaifiyat hai in dinon

na KHushi hai aur na koi malal

zindagi tera muqaddar maut hai

roz hum karte hain teri dekh bhaal

ek to ye dozaKH mila indhan talab

aur is par justuju rizq-e-halal

jis jagah par KHatm hon sab raste

phir wahin se ek naya rasta nikal

ye bata rawaq ke mani hain kya

bhuk ki shiddat ye karti hai sawal

mere jaise shairon ki zindagi

na to mazi hai na mustaqbil na haal

zindagi mein sab ke sab uljhe hue

zindagi hai bhi bahut mushkil sawal

chhoD de ab tir-o-tarkash chhoD de

guftugu se masale ka hal nikal