اے خدا کیوں نہ ہوا حشر کا ہنگام شروع

اے خدا کیوں نہ ہوا حشر کا ہنگام شروع

ہو چکا سلسلۂ ظلم سر عام شروع

جب انہیں حرف محبت کی خبر ہے ہی نہیں

ان سے کچھ سوچ کے کر نامہ و پیغام شروع

جی جلائے گی بہت غالبؔ مرحوم کی یاد

گرمیاں پڑنے لگیں ہونے لگے آم شروع

زندگانی تھی کہ اک جادۂ دشوار طلب

سر آغاز سے تھی کلفت انجام شروع

دیکھ میں شمع سبک تاب سہی اے خورشید

اب ترا کام ہوا ختم مرا کام شروع

آئیں کعبے میں جو اس دشمن ایماں کے قدم

بت پرستی ہو سر حالت احرام شروع

احتراماً کوئی داخل ہوا ننگے پاؤں

جب ہوئے شہر تمنا کے در و بام شروع