اے خدا شہر محبت میں کبھی ایسا نہ ہو

اے خدا شہر محبت میں کبھی ایسا نہ ہو

بھوک سے بیتاب کوئی بھی یہاں بچہ نہ ہو

کیا خبر اس شخص کو مجبوریاں ہوتی ہیں کیا

غربت و افلاس کو جس نے کبھی دیکھا نہ ہو

چاہتا ہوں میں کہ لا محدود ہو میرا خیال

دائرے کی شکل میں یہ اک جگہ سمٹا نہ ہو

جو مری تقدیر میں لکھا تھا مجھ کو مل گیا

اب مری آنکھوں میں یا رب دوسرا چہرہ نہ ہو

بے سر و سامانیوں میں زندگی جیتا ہوں میں

اے خدا دشمن کو بھی یہ دکھ ملے ایسا نہ ہو

تم مجھے اپنا کہو میں بھی تمہیں اپنا کہوں

جان من یہ پیار دنیا میں کبھی رسوا نہ ہو

چاہتا ہوں میں یہی ناظرؔ کہ سب سے ہو نباہ

میرے ہونٹوں پر کبھی احباب کا شکوہ نہ ہو