ai KHusha-waqte ki shoKH-e-tarah-dar aa hi gaya

ai ḳhushā-vaqte ki shoḳh-e-tarah-dār aa hī gayā

haañ vo jān-e-mai-kada msatānā-vār aa hī gayā

dard kī shiddat hī āḳhir dard kā darmāñ banī

be-qarārī se mujhe āḳhir qarār aa hī gayā

yaad the un ke mujhe sab ahd-o-paimāñ toḌne

vāda-e-fardā pe lekin e'tibār aa hī gayā

maut laa.ī hai payām-e-iḳhtitām-e-ranj-o-ġham

aa gayā vo vaqt ba.ad-e-intizār aa hī gayā

is taraf josh-e-mohabbat us taraf josh-e-shabāb

aa gayā haañ un pe dil be-iḳhtiyār aa hī gayā

zauq-e-ḳhud-bīnī ne dikhlā.ī 'sahar' apnī bahār

husn ke ma.asūm chehre par nikhār aa hī gayā

ai KHusha-waqte ki shoKH-e-tarah-dar aa hi gaya

han wo jaan-e-mai-kada msatana-war aa hi gaya

dard ki shiddat hi aaKHir dard ka darman bani

be-qarari se mujhe aaKHir qarar aa hi gaya

yaad the un ke mujhe sab ahd-o-paiman toDne

wada-e-farda pe lekin e'tibar aa hi gaya

maut lai hai payam-e-iKHtitam-e-ranj-o-gham

aa gaya wo waqt baad-e-intizar aa hi gaya

is taraf josh-e-mohabbat us taraf josh-e-shabab

aa gaya han un pe dil be-iKHtiyar aa hi gaya

zauq-e-KHud-bini ne dikhlai 'sahar' apni bahaar

husn ke masum chehre par nikhaar aa hi gaya